ACA-RCL (1-2) : si compii una billissima seria

Purtati cù fervori da u populu di Timizzolu, l’AC Aiacciu mettini subbitu i mani in pasta ! I ghjucadori d’Olivier Pantaloni pigliani a suprana dopu à 10 minuti di ghjocu. Alexis Flips tira un corner à dritta, mandendu u ballò à Qazim Laci chì marca ! Ùn s’hè micca fattu prigà u mezu di tarrenu pà metta un stucciu in lu but di Jean-Louis Leca (1-0). I Bianchi è Rossi sò sireni è sani ammaistrà u ghjocu cù u sustegnu di u publicu. Ci vò quantunqua ch’ellu intarvinissi parechji volti Benjamin Leroy è chì a difesa aiaccina fessi un bellu travagliu cullittivu pà tena stu risultatu. À a fini di a prima parti, Capitanu Cavalli hà guasgi marcatu cù un tiru di u pedi mancu senza chì nimu a s’aspittessi ma pà sfurtuna, u ballò passa accantu ! Ancu Courtet si dà di rimenu in davanti. Si compii u prima tempu cù stu 1-0.

10 minuti dopu à a ripresa, Lens è Sotoca ani da prufittà di a sculisciata di Diallo pà marcà. L’attaccanti piglia u ballò è si prisenta solu di pettu à Leroy 1-1 (56’). I ghjucadori di Philippe Montanier rivenini da veru in la partita dopu à ‘ssu sbagliu. Stanchi da i sforzi, Cavalli, Tramoni è po Flips sò rimpiazzati da El Idrissy, Cuypers è Jallow. I sforzi di l’Aiaccini ùn farani micca piantà l’assalti di Lens in la siconda partita. Annantu à un’azzioni bella ammaistraita, Sotoca marca dinò à u sicondu palu 1-2 (70’). Hè cusì chì i Nurdisti pigliani a suprana. I nostri Bianchi è Rossi cercani à rivena à a fini di u scontru cù un tiru di Diallo (86’) ma passa accantu. Scunfitta di i nostri di pettu à u sicondu di u campiunatu. Ma ùn ci vò micca à lintà è appruntassi com’ellu si devi à parta da luni pà l’ultimu scontru di l’annu in Troyes cuncurrenti direttu in li primi piazza di a classifica. Forza à i nostri bianchi è rossi !