ACA-ASNL (0-0): u riassuntu

Di ritornu annantu à u so tarrenu, l’Aiaccini t’ani avutu u so da fà pà st’ondicesimu scontru di Domino’s Ligue 2. Dopu à unipochi di minuti, u tempu d’adattassi à u tarrenu, a squadra hà fattu sapè i so intinzioni. À a 6a minuta, Hugo Cuypers marca d’un tiru cruciatu ma u ghjovanu ghjucadori hè dichjaratu for di ghjocu. Calchì minuta dopu, l’ACA si prisenta dinò davanti à u but : a ripresa di Choplin annantu à un corner di Coutadeur passa ghjust’accantu. Appinuccia più tardi, Cyrille Bayala, sirvutu da Huard, a si pruvava cù una incapata… Valette chjappava u ballò (21’). Nanzu à a mez’ora di ghjocu, Gaetan Courtet rigalava à i sustinidori una billissima ripresa annantu à un centru di Mathieu Coutadeur, ma u ballò hè passatu daretu à u but di Nancy. À a fini di a prima parti, u risultatu era di 0-0, cù a più maiò parti di l’azzioni chì sò stati bianchi è rossi è solu calchì stonda d’attività pà l’ASNL à u principiu è à a fini di stu prima tempu.

À a ripresa, a vulintà di l’Orsi era sempri a listessa. Cuypers (47’), Tramoni (52’ è 63’) ani circatu à marcà senza successu. Dopu à un’ora di ghjocu, Benjamin Leroy hà fattu dui belli arresti è Cédric Avinel hè intarvinutu dui volti da salvà a so squadra. U coach Olivier Pantaloni hà circatu à fà cambià l’affari fendu entra à Ablie Jallow è po Johan Cavalli. U ritimu calava à a fini è Benjamin Leroy hà salvatu a so squadra cù dui arresti magnifichi.