Campioni di Francia di Siconda Divisioni à a fini di a staghjoni scorsa, a nostra squadra di l’ACA Futnet ripiglia stu sabbatu (u 20 d’uttrovi) a strada di a cumpitizioni.
Vincia da u principiu
A sizzioni bianca è rossa di Futnet ghjugni quist’annu in la cumpitizioni naziunali a più alta di ‘ssu sport.
Sabbatu chì veni, i cumpagni d’Anthony Agostini partini in Parighji pà dui partiti contru à i squadri di Villiers-sur-Marne è Issy-les-Moulineaux.
In sta catiguria à trè ghjucadori par ogni squadra, i scontri si facini in 3 parti à 15 punti.
A vulintà di tutti i ghjucadori hè bella chjara : vincia è ritruvassi u più prestu pussibuli, in cima à a classifica di sta prima divisioni.
A squadra aiaccina pudarà cuntà annantu à a spirienza di puntelli com’è Matteu Caviglioli è Eric Jecker chì hè dighjà statu campionu di D1.
Un mondu novu
L’ottu squadri ch’ellu hà da scuntrà l’ACA pà ‘ssa staghjoni sò : Fc Sète 34, Aubagne, Genilac, Villiers/Marne, Issy les Moulineaux, Nantes, Olonne sur Mer è Emerainville.
I quattru primi squadri di u campiunatu sarani qualificati pà i plays-off à a fini di a staghjoni rigulari.
Eccu quì a squadra ritinuta pà a prima ghjurnata di D1 : Apriani Olivier, Barré Sébastien, Caviglioli Matteu, Jecker Eric è Mariani Bastien.
Pà ciò tocca à a riserva di l’ACA Futnet, a soia a staghjoni in D2 principia u 27 d’uttrovi incù una prima partita in Saint-Raphaël.