À l'ora di a ripresa pà i nostri Ursucci, femu un prima bilanciu di a prima parti di a staghjoni incù Patrick Leonetti. U dirittori di u centru di furmazioni di l'ACA ci parla di i risultati di i nostri ghjovani, a cunferma di u permissu di u centru in 2021 è a so vulintà di rinfurzà u travagliu intornu à l'identità di i nostri squadri.
Stà in Naziunali 3
Chì ni pinseti di sta prima parti di campiunatu ch’ella hà fattu a nostra riserva o Patrick ?
Emu cuminciatu binissimu cù scontri amichevuli assai intarissanti è un bellu principiu di staghjoni senza perda fin’è l’11esima ghjurnata di campiunatu. Dopu hè stata più difficiuli soprattuttu par via di i dui scontri ripurtati. Pensu ch’elli ani un pocu persu u ritimu i ghjucadori è tandu i risultati erani menu boni. Hè quantunqua una prima parti intarissanti ancu s’e pensu chì no pudiamu fà megliu cà cusì.
Appruntà l'avvena
È pà i dui altri catigurii naziunali, hè pusitivu u bilanciu ?
A squadra U19 Naziunali hà fattu una billissima prima parti di staghjoni. U puntu pusitivu hè d’avè una squadra cù assai ghjovani di quì. Dui ghjurnati nanzu à a treva, erani sicondi i nostri Ursucci, hè binissimu. In Gambardella, emu battutu l’OM è faci piacè pà una squadra chì conta 10 corsi in li 16 ghjucadori. Sta catiguria U19 hè viramenti quilla chì hà fattu u megliu in sta prima parti. In U17 Naziunali, hè stata appena dura à u principiu cù parechji scambiamenti di ghjucadori ma cù u so travagliu, Dominique Bijotat hà sappiutu accuncià l’affari è alzà u nivellu dinò à a classifica ancu s’ellu ùn hè micca u scopu principali. Si ghjoca megliu è a squadra hè più attiva.
Chì sò i vostri scopi pà a siconda parti di a staghjoni ?
U prima scopu hè di mantenaci in Naziunali 3 u più prestu pussibuli ancu sì no t’emu i guai à capiscia u sistema di falata in Naziunali 3 ch’ùn ammaistremu micca. Squadri chì falani in lu nostru gruppu, ci ni pò essa da 3 à 5. Risichi ci n’hè sempri è tandu c’hà da vulè à ghjucà à fondu fin’è a fini. U sicondu hè d’avè i ghjucadori dispunibuli pà u gruppu prufiziunali è priparà a staghjoni chì veni. Di marzu, cuminciaremu à appruntà l’avvena.
Sempri in cuntattu cù i prufiziunali
Si vedi chì vo travaglieti assai cù u gruppu prufiziunali chì parechji ghjovani sò chjamati par intrinassi cù a squadra sottu à u cumandu di u staff prufiziunali è ancu pà cumplittà u gruppu !
Iè semu sempri in cuntattu, t’emu un staff prufiziunali chì s’intaressa assai à a furmazioni è t’emu assai ghjovani ghjucadori chì s’affaccani in lu mondu prufiziunali. Ùn hè micca faciuli di fassi a so piazza in una squadra prufiziunali chì riesci cusì. À i ghjovani, li cunsigliu sempri di piglià l’esempiu di i i so maiò. À l’intrinamentu o pà i scontri, t’ani sempri un bellu spiritu colmu di valori è di sulidarità chì mi piaci assai. Pensu chì li porta assai è hè bon segnu pà i nostri ghjovani chì sò furtunati di pudessi intrinà è essa à fiancu à sti ghjucadori prufiziunali.
Sviluppà l'aspettu suciali è identitariu
Un antr’annu, c’hà da vulè à rinuvà u permissu di u centru di furmazioni. Chì hè u vostru prughjettu pà sviluppallu ?
Annu, sò ghjunti i riprisintanti di a FFF pà fà u puntu annantu à ciò chì ci vò par appruntà a nostra dumanda di permissu. Rispundimu à tutti i dumandi di a Federazioni cù un analistu videò è un rifarenti socioeducativu par isempiu. Emu da sviluppà parechji attività, fà i cunfarenzi è custruiscia un veru prughjettu suciali. Quì t’emu una missioni impurtantissima, quilla d’accumpagnà i nostri ghjovani com’ellu si devi. È po emu da fà attelli pà imparà a storia, a cultura è a lingua corsa. Aldilà di u ballò è di a scularità, hè st’accumpagnamentu suciali è culturali chì no emu da sviluppà sempri di più.
Parlendu d’avvena è d’identità, hè sempri listessa a filusufia di ricrutamentu à u centru di furmazioni di l’ACA ?
Pà u ricrutamentu, mi piaciaria à fà di l’identità una carta maestra! A vulemu fà ma quista a vulintà devi essa spartuta in tutta a Corsica. Semu u solu centru di furmazioni prufiziunali è validatu di l’isula, ci vò chì i famigli è i clubs amatori ci pudessini fà cunfidenza quandì no vulemu piglià un ghjovanu corsu chì t’hà i qualità. Quì, semu u N°1 di a furmazioni è vulemu dà à tutti a pussibulità di travaglià da ghjugna un ghjornu à u nivellu u più altu.
