U centru di furmazioni, pà fà campà a lingua corsa

AC Ajaccio

U centru di furmazioni di l’ACA hè sustinutu da i so partinarii i più fidi ! Sta mani, u prisidenti Christian Leca è u dirittori di u centru di furmazioni Sébastien Bannier ani prisintatu i 4 partinarii maestri chì si vidarani tuttu l’annu annantu à i tinuti è u matiriali di a squadra riserva, l’U19 Naziunali è l’U17 Naziunali. Unu d'elli sarà Aiò, prugramma d'Aflokkat pà u sviluppu di a lingua è di a cultura corsa.

4 partinarii maestri

Hè a prima volta in tutta a storia di a furmazioni aiaccina chì 4 partinarii maiò sustenini tutti i squadri naziunali di l’AC Aiacciu. I partinarii storichi ani dicisu di purtà u so sustegnu à a ghjuventù Bianca è Rossa, sumenti di l’avvena di u club. Augustin Torre riprisintanti di Gamm Vert Aiacciu è anzianu dirighjenti di u club. U magazenu preferitu di l’urtulani amatori è prufiziunali sarà prisenti annantu à i shorts di i trè catigurii. Un antru partinariu storicu, Allianz Gilles Leca. U so logò, bellu cunnusciutu in lu mondu spurtivu, u pudareti veda à u daretu di i maglietti di i nostri Orsi amatori. I vesti purtarani u logò di l’intrapresa Pro Déménagement. Sta sucità famigliali chì susteni u club dipoi parechji anni hè duvintata spicialista di a so attività in la Corsica sana.

AIÒ, partinariu maiò

Dopu à i partinarii storichi, Christian Leca hà prisintatu u nuvellu sponsor chì sarà annantu à i maglietti principali di i trè catigurii. Si tratta d’AIÒ, un prugramma novu novu fattu da l’urganisimu di furmazioni corsu AFLOKKAT è sustinutu da a Cullittività di Corsica. Eccu quì una billissima iniziativa pruposta à tutti quilli chì t’ani a vulintà d’imparà a lingua corsa è di falla campà. Attelli ci ni sarà parechji : corsi a sera, attelli di storia, cunfarenzi è dibattiti, ghjurnati d’immersioni, ghjochi, rializazioni di filmetti in lingua corsa, cucina, scuparta di u patrimoniu, attelli parenti è zitelli… u scopu hè sempri u listessu : imparà cù u piacè. Tutti i participanti sarani invitati à passà u so certificatu di lingua corsa. U nostru prisidenti hè più cà fieru di metta u ballò à u sirviziu di a prumuzioni di u prugramma AIÒ. D’altrondi, l’ACA pruponi à u publicu un situ bislingu è hà da cuntinuà à sviluppà, ogni ghjornu di più, assai cuntinuti in lingua nustrali. Una bella occasioni pà Sébastien Bannier di ramintà l’impurtanza di l’identità è di a cultura in la furmazioni : « I nostri ghjovani in furmazioni devini cunnoscia u mondu inghjiru à elli, l’amori di i so culori, a cultura è a lingua chì sò impurtanti in la furmazioni di i ghjucadori ».

L'ACA ringrazia i so partinarii

Dopu à a prisintazioni di i 4 partinarii, u prisidenti Christian Leca è i ghjucadori di u centru di furmazioni Dumè Borelli, Jean-Dominique Leca, Pierre-Joseph Bucchini, Thomas Berenguier è Paolo Lebas si sò cunsacrati una stonda à i ritratti è à i dumandi à a stampa. L’AC Aiacciu hè fieru d’avè u sustegnu d’Aflokkat, di Gamm Vert, d’Allianz è di Pro Déménagement. 

Autres publications

Newsletter