Dui ghjorni nanzi à a 38esima ghjurnata di Domino’s Liga 2, Olivier Pantaloni ci dici ciò ch’ellu aspetta di i so ghjucadori pà stu scontru di primura annantu à u tarrenu di Troyes.
Comu si passa sta simana di travagliu nanzi à u scontru impurtantissimu di vennari contru à Troyes?
Emu fattu u puntu annantu à a nostra situazioni circhendu di ricaccià l’affari pusitivi da tena à menti parchì tutt’ognunu dessi ciò ch’ellu t’hà di megliu. Ci tocca à essa sempri più serii in lu nostru travagliu da essa sireni a sera di u scontru è pudè metta in piazza u nostru ghjocu senza timori. Tuttu si ghjucarà à u nivellu di u spiritu è di a mutivazioni di a squadra.
Chì hè statu u vostru missaghju à i ghjucadori par appruntà sta partita?
Hè bellu chjaru u u missaghju : c’andemu pà circà à vincia è essa sicuri di stà in Liga 2 pà un antr’annu. Sò più cà sicuru chì i ghjucadori ani da dà tuttu pà ghjugnaci. Ùn ni dubbiteghju manc’appena.
Comu u pripareti ‘ssu scontru contru à l’ESTAC?
Sicura ch’ellu ùn hà micca da essa faciuli posta chì Troyes hè una bella squadra incù ghjucadori di qualità. In tutti i casi, ghjuchemu a nostra piazza in Liga 2 è emu da fà tuttu pà salvacci stu vennari.
