Trè ghjorni nanzu à u scontru for di casa contru à Le Mans (vennari u 20 di sittembri à 8 ori di sera), u nostru numaru 7 Cyrille Bayala chì hà dighjà mustratu assai qualità annantu à u tarrenu ci parla di u so principiu di staghjoni in Biancu è Rossu.
Una bella accolta
Comu si sò passati i to primi sittimani in la squadra Bianca è Rossa ?
Tuttu si passa bè dipoi a me ghjunta posta ch’e sò statu accoltu più cà bè. I ghjucadori m’ani integratu à a lestra in la squadra com’è u coach chì mi faci cunfidenza. Travagliemu tutti insemi cù un bellu spiritu da fà a più bella staghjoni pussibuli.
Ghjustappuntu, chì ni pensi tù di stu principiu di staghjoni ?
Semu sempri in una bella dinamica malgradu l’ultimu scontru in casa contru à Orléans ch’ùn hè micca andatu com’è no vuliamu ma emu da cuntinuà à travaglià tutti i ghjorni da fà assai prugressi è essa sempri più forti.
M'intaressu à a cultura corsa
Comu ti senti trè ghjorni nanzu à l’8esimu scontru di u campiunatu contru à Le Mans?
Mi sentu viramenti bè. Vogliu dà tuttu ciò ch’aghju in mè annantu à u tarrenu. Hè vera ch’ùn sò ancu statu ricumpinsatu ma aghju da cuntinuà à fanni sempri di più da fà cambià l’affari ! C’hà da vulè à essa assai serii è cuncintrati pà rivena da u MMArena cù un risultatu pusitivu.
Annantu à a to pagina Facebook, ti sè ancu missu à scriva in corsu ! Hè impurtanti par tè?
Da ch’e sò ghjuntu in Aiacciu, aghju cuminciatu à intarissammi à a lingua è a cultura corsa. Tandu, m’hè parsu nurmali di circà à scriva unipochi di missaghji in corsu da fà piacè à tutti quilli chì mi suvitani ! È ancu à mè mi faci piacè !
Ai da imparà u corsu allora ?
Ùn hà micca da essa faciuli, quissa a socu, ma aghju da pruvà !
