Dopu à una bella vittoria in Orléans (1-3), i nostri Bianchi è Rossi ani da ghjucà sabbatu in Lens incù a vulintà di piglià u più punti pussibuli nanzi à a treva. Eccu l’intervista di l’intrinori dui ghjorni nanzi à l’ultimu scontru di l’annata 2018.
Comu vi sintiti dopu à a vittoria di vennari scorsu contru à Orléans ?
Pensu ch’ella hè una bella ricumpensa pà i ghjucadori. Emu ghjucatu di manera seria fendu una bella partita ancu sì a squadra hà rinculatu è t’hà avutu i difficultà dopu à u nostru prima but.À a fini di a prima parti, eru scuntenti chì Orléans avissi marcatu è mi paria chì no pudiamu fà megliu cà cusì. Quand’ellu si marca i prima in la nostra situazioni, ùn ci vò à lintà nulla.
Cosa spireti di ‘ssu scontru contru à Lens ?
Ci vò à piglià u più punti pussibuli : più ni pigliemu avà è menu sarà difficiuli in la siconda parti di a staghjoni.
Sicura chì incù 18 punti, vidimu l’affari di manera più pusitiva è saria viramenti bè di piglià unipochi di punti contru à Lens nanzi à i vacanzi. Sò cunvintu chì a me squadra t’hà i capacità di piglià i 3 punti.
Ancu s’ellu si pò pinsà ch’ellu hà da essa un scontru cumplicatu, semu capaci di fà calcosa.
Chì ci hà da vulè à fà pà piglialli sti punti ?
Sì no stemu quì à fighjulalli è à aspittalli senza fà ciò chì ci vò, semu sicuri di perda. Ci hà da vulè à essa cuncintrati è à essa forti annantu à u tarrenu senza lintà, fin’è l’ultima siconda.
