Dui ghjorni nanzi à u spiazzamentu in Parighji, l’intrinori Olivier Pantaloni spera chì i so ghjucadori sarani capaci di piglià à u minimu un puntu mustrendu tutti i so qualità è senza avè paura d'una squadra chì ghjoca a cullata in prima divisioni.
Di u scontru contru à Niort, chì ni ritiniti ?
Pensu chì ancu sì no emu vintu, à u nivellu di u ghjocu, hè statu unu di i nostri peghju scontri.
In tutti casi, sì no vulemu piglià i punti in Parighji, ci hà da vulè à essa belli più forti in difesa parchì emu suffertu assai in lu sicondu tempu contru à Niort. Ci vurrà dinò à essa putenti davanti pà pona i prublemi à una squadra ch’ùn hà presu cà 3 buts in casa dipoi u principiu di a staghjoni.
Comu l’apprunteti ‘ssu spiazzamentu in Parighji ?
Sì no ùn aviamu micca vintu contru à Niort, t’avariamu avutu assai di più prissioni prima d’andà in Parighji. Quì, emu da scuntrà una squadra chì ghjoca a cullata è chì hè assai forti, soprattuttu in casa soia. C’andemu cù a vulintà di piglià almenu un puntu. Ùn ci spiazzemu micca solu pà difenda ma pà sviluppà u nostru ghjocu com’ellu si devi senza avè paura di ‘ssa squadra.
Pinseti chì ‘ssa partita hà da essa più cumplicata cà quilli di dopu ?
Partiti faciuli ùn ci n’hè micca, ma hè vera chì Parighji hè una grossa squadra incù un bellu parcorsu è una difesa assai putenti. Hà da essa cumplicata ma emu da veda sì no semu capaci di ripigliacci dopu à un scontru incù un cuntinutu abbastanza debuli contru à Niort.
