Stu sabbatu u 18 di maghju, l'AC Aiacciu Futnet chì hà fattu una billissima prima staghjoni à u più altu nivellu qualifichendusi pà i Plays Offs, hà l'onori d'organizà a finali di u campiunatu di Francia di Futnet di Divisioni 1.
Un ivinimentu maiò in Aiacciu
A squadra Bianca è Rossa organizeghja un bellu ivinimentu sabbatu chì veni à u Centru di u Sport è di a Ghjuventù Corsa incù scontri trà i 4 primi squadri di u campiunatu pà a staghjoni 2018-2019. Da ricumpinsà u so travagliu, a Federazioni Francesa di Futnet (FFDAF) hà dumandatu à l'ACA Futnet d'organizà a finali dopu à parechji edizioni in Loire Atlantique (Olonne-sur-Mer è Nantes). Una finali di qualità posta chì parechji ghjucadori internaziunali di rinoma farani parti di a cumpitizioni.
Una bella festa da campà insemi
Fendu parti di i 4 primi squadri di a classifica, l'Aiaccini ani mustratu ch'elli t'aviani assai qualità ghjugnendu fin'è a finali di prima divisioni. I scontri principiarani à 2 ori è mezu. L'intrata hè gratusi. Viniti numarosi pà sustena i Bianchi è Rossi è pà incuraghjisciali com'ellu si devi in 'ssa bella ghjurnata di festa.
A squadra aiaccina 2018-2019
A squadra aiaccina pà a staghjoni 2018-2019 :
Anthony AGOSTINI, Stéphane MELONI, Sébastien BARRÉ, Olivier APRIANI, Matteu CAVIGLIOLI, Ludo DE LANFRANCHI, Laurent LORENZINI, Jean-Louis PASQUINELLI, François FENECH, Éric JECKER, Christophe PASQUALI, Bastien MARIANI, Arnaud THIERRY, Roch AGOSTINI.
